Hordabø sitt damelag er kretsmeistrar i kvinnene sin 4. divisjon, etter at laget slo Rosendal 3-4 i helga.

- Det var jamt heile vegen, men eg synest det var ein fortent siger. Dei hadde ein lynrask spiss som skåra alle måla deira, elles var vi eigentleg best, seier Hordabø-trenar Frode Myking etter at laget hans sikra kretsmeisterskapen søndag.

Det var fire blad Marøy som sytte for Hordabø sine skåringar. Lagets toppskårar Helene Marøy teikna seg sjølvsagt på skåringslista, saman med Christina og Sandra som delar same etternamn som Helene.

Den avgjerande skåringa var det Ingrid Marøy som stod bak, berre nokre få minutt før full tid

Ingrid matchvinnar

- Ingrid har ikkje vore med så mykje i år, men ho har trena med oss den siste månaden, og ho har verkeleg imponert meg. Kjekt at ho vart matchvinnar, seier Myking til nh.

I tillegg til Ingrid Marøy, hadde Myking også tatt med tre jentespelarar til kampen mot Rosendal. Alle desse klarte seg godt på det sleipe underlaget i Sunnhordland.

Hordabø har all grunn til å vera nøgd med årets sesong. Laget kan sjå tilbake på ei 4. divisjonsavdeling der berre ein kamp enda med tap og ein med uavgjort.

12 sigrar sikra laget direkte opprykk til 3. divisjon, og i helga vart jubelsesongen altså krona med ein KM-tittel.

Kjempesesong

- Eg trur ikkje vi kunne gjort så mykje annleis, eigentleg. Uavgjortkampen spelar vi heile 2. omgang med berre ti spelarar, og tapet kjem etter at opprykket er sikra, i ein kamp der vi manglar seks spelarar frå startellevaren. Vi er godt nøgd, seier Myking til nh.

Kva som skjer i Hordabø-leiren neste år er enno ikkje avgjort. Myking fortel at han har veldig lyst å trena laget vidare, men at han også har andre omsyn han må ta.

- Det er ein veldig fin gjeng å ha med å gjera, men det er jo litt tidkrevjande, så ingenting er avgjort enno. Vi skal ha eit møte om eit par veker. Eg veit nok meir etter dette, seier han til nh.

Ingen gir seg

Så langt er det ingenting som tyder på at nokon kjem til å gi seg på opprykkslaget til Hordabø.

Myking kan fortelja at fleire av dei unge jentespelarane i klubben allereie bankar på døra til A-laget, og han håpar også på nokre comeback framfor neste sesong.

- Eg har ikkje fått signal om at nokon kjem til å slutta, og då har vi ein god stamme. Vi håpar også at ein del spelarar gjer comeback. Det er mange gode spelarar som har gitt seg dei siste åra, men som kanskje kan vera interessert i å byrja igjen no, seier Myking til nh.